சேரவஞ்சி கவிதைகள் 13



மதிப்பிற்குரிய ஐயா திரு சாமானியர்

குற்றவாளியுமற்ற
நிரபராதியுமற்ற
திரு சாமானியரின்
வழக்குகளால் தான்
கல்லா கட்டிக்கொண்டிருக்கிறது
வாழ்க்கை

ஒரு சராசரி சாமானியன் அவர்கள்
காலையில் எட்டு முப்பதுக்கும்
ஒன்பதுக்கும் இடையிலான
திருப்பள்ளியெழுச்சியின் நிறைவுப்பகுதியாய்
தலையணைக்குள்ளிருந்து
செல்போனை உருவியெடுத்து
நுழைகிறார் பேஸ்புக்குக்குள்

மிகத்துல்லியமாய்
அடுத்த பத்து நொடிக்குள்
வாதிடத் தொடங்குகிறார்
தன் கட்சிக்காக
தன் தலைவனுக்காக
தன் கிரிக்கெட் அணிக்காக
தன் இளவல் இசைவல்லுனருக்காக
தன் சாதித் தலைவருக்காக
தன் வீட்டுப் பூனைக்குட்டிக்காக
தான் விளக்கிய பற்பசையில் இருக்கும் உப்பிற்காக..

ஒரு மிகுந்த ஆவலின் கனிவோடு
நிரூபித்துக்கொண்டே இருக்கப்
பிரயத்தனப் படுகிறார்
யாரிடமாவது
எதையாவது
எப்படியாவது
எப்போதுமே

ஒரு கண்ணடிக்கிற
ஸ்மைலியில் தன்
வெற்றியை அறிவிக்கிறார்
அவ்வப்போது
ஒருமனதாக.

அடுத்து ஒரு நாள்
அடுத்து ஒரு வழக்கு
அடுத்த நகைச்சுவையின்
அடுத்த சுவாரசியக் கச்சேரி

கனம் சாமானியர் அவர்களின்
வாழ்க்கையிலிருக்கிற ஒரு வேலைப்பளு
'கனம் கடவுள் அவர்களே'வுக்குக் கூட இருக்குமோ இருக்காதோ.

Comments