சேரவஞ்சி கவிதைகள் 20

•
சற்று திறந்த
அலமாரியினுள்
மறைந்துகொள்வதாய் நெளிந்துகொண்டிருக்கிற
அப்பாவின்
சிறுபிள்ளை போல்
அமர்ந்துகொள்கிறது

ஏரிக்குள்
ஏறி
எட்டிப்பார்க்கிற
தனிமையின் ஒரு
மரக்கிளையில்
இளவேனில்
காலத்தில் கூடிழந்த
குக்கூ ஒன்று

•
ஒன்று உண்டாயெனக் கூட அறிந்திருக்கவில்லை
அது இன்னும்
கூடிழக்கும் காலமென்று
ஒன்றை

இளவேனில் காலத்துக் கூடிழப்போ
அமானுஷ்யத்தினும்
அமானுஷ்யம்
இதற்கு

•
என்றாலும்
மோசமில்லை
ஒன்றும்

•
மர நிழலைத் தருகிறது
கரையோரக் குளிர்

பச்சையத்தை
பாசி தருகிறது

இலையுரசும் சங்கீதத்தை
இசைக்கிறது
அலை புரளும் நீர்

சக குக்கூக்கள் வரவுண்டு
வைகரையின் இக் கிளையிலும்

உண்டு ஒன்று
மற்றொன்றாய்
என

ஒவ்வொன்றும் உண்டு இங்கு
கூட்டைப் போலவே
ஏரியிலும்
•

நேற்றொரு பறவை வந்திறங்கியது
கிளையின் மறு பிரிவில்

எங்கிருக்கிறது உன் கூடு
என்றது இதை அது
கீச்சிக்கொண்டிருந்தன்
மத்தியில்

நீரசைவில்லை
குளத்தில் ஒரு கணம்

தீப்பிடித்தெரிந்தது அதன்
உள்ளுக்குள்ளுக்குள்.

•
சேரவஞ்சி

#அந்நியப்_பறவை